Bible-Server.org

translate into

איכה פרק5

‮1 זכר יהוה מה היה לנו הביט וראה את חרפתנו׃

‮2 נחלתנו נהפכה לזרים בתינו לנכרים׃

‮3 יתומים היינו אין אב אמתינו כאלמנות׃

‮4 מימינו בכסף שתינו עצינו במחיר יבאו׃

‮5 על צוארנו נרדפנו יגענו לא הונח לנו׃

‮6 מצרים נתנו יד אשור לשבע לחם׃

‮7 אבתינו חטאו אינם אנחנו עונתיהם סבלנו׃

‮8 עבדים משלו בנו פרק אין מידם׃

‮9 בנפשנו נביא לחמנו מפני חרב המדבר׃

‮01 עורנו כתנור נכמרו מפני זלעפות רעב׃

‮11 נשים בציון ענו בתלת בערי יהודה׃

‮21 שרים בידם נתלו פני זקנים לא נהדרו׃

‮31 בחורים טחון נשאו ונערים בעץ כשלו׃

‮41 זקנים משער שבתו בחורים מנגינתם׃

‮51 שבת משוש לבנו נהפך לאבל מחלנו׃

‮61 נפלה עטרת ראשנו אוי נא לנו כי חטאנו׃

‮71 על זה היה דוה לבנו על אלה חשכו עינינו׃

‮81 על הר ציון ששמם שועלים הלכו בו׃

‮91 אתה יהוה לעולם תשב כסאך לדר ודור׃

‮02 למה לנצח תשכחנו תעזבנו לארך ימים׃

‮12 השיבנו יהוה אליך ונשוב חדש ימינו כקדם׃

‮22 כי אם מאס מאסתנו קצפת עלינו עד מאד׃